Виржил ван Дейкнинг голи «Ливерпуль»га «Сандерленд»га қарши сафар ўйинида (1:0) ғалаба келтирди. Нидерландиялик ҳимоячи чоршанба куни бўлиб ўтган Англия чемпионати 26-тури доирасидаги баҳснинг 61-дақиқасида «қора мушуклар» дарвозасини ишғол қилди.

«Opta» хабарига кўра, ван Дейкнинг «қизиллар» сафида Премьер-лига доирасида урган голлари сони 23 тага етди. Бу клуб тарихида ҳимоячилар орасидаги янги рекорд ҳисобланади. Аввалги рекорд узоқ йиллар давомида Сами Хююпяга тегишли эди.

Виржил ван Дейк 2018 йил бошидан буён «Ливерпуль» шарафини ҳимоя қилиб келмоқда. АПЛнинг жорий мавсумида мерсисайдликлар сардори 26 та учрашувда майдонга тушиб, ўз ҳисобига 2 та гол ёздириб қўйди.

Айни дамда «Ливерпуль» 42 очко билан турнир жадвалида 6-ўринни эгаллаб турибди.