Virjil van Deykning goli «Liverpul»ga «Sanderlend»ga qarshi safar o‘yinida (1:0) g‘alaba keltirdi. Niderlandiyalik himoyachi chorshanba kuni bo‘lib o‘tgan Angliya chempionati 26-turi doirasidagi bahsning 61-daqiqasida «qora mushuklar» darvozasini ishg‘ol qildi.
«Opta» xabariga ko‘ra, van Deykning «qizillar» safida Premyer-liga doirasida urgan gollari soni 23 taga yetdi. Bu klub tarixida himoyachilar orasidagi yangi rekord hisoblanadi. Avvalgi rekord uzoq yillar davomida Sami Xyuyupyaga tegishli edi.
Virjil van Deyk 2018 yil boshidan buyon «Liverpul» sharafini himoya qilib kelmoqda. APLning joriy mavsumida mersisaydliklar sardori 26 ta uchrashuvda maydonga tushib, o‘z hisobiga 2 ta gol yozdirib qo‘ydi.
Ayni damda «Liverpul» 42 ochko bilan turnir jadvalida 6-o‘rinni egallab turibdi.
