«Chelsi» bosh murabbiyi Xabi Alonso yarim himoyachi Moyses Kaysedoni jarohatdan keyin juda erta maydonga tushirib, xatoga yo‘l qo‘yganini tan oldi.

O‘tgan hafta oxirida «Chelsi» «Brayton»ni 4:3 hisobida mag‘lub etgan uchrashuvda Kaysedo zaxiradan maydonga tushirilgan, ammo keyin yana almashtirishga to‘g‘ri kelgan edi. Shu sababli ekvadorlik futbolchi yakshanba kuni «Arsenal»ga qarshi derbini o‘tkazib yubordi.

«Emireyts»dagi 1:2 hisobidagi mag‘lubiyatdan so‘ng Alonso Kaysedoning holati haqida gapirib, bu safar jamoaning muhim futbolchisiga to‘liq tiklanishi uchun yetarli vaqt berishini aytdi.

«Bu ko‘p vaqt talab qilmaydi. Bu yerda eng muhimi — xavfni to‘g‘ri baholash. O‘tgan hafta uni juda erta maydonga tushirdik. Men bu xatoni yana takrorlamayman.

Mag‘lubiyatdan keyin maydonda bo‘lmagan futbolchilar haqida gapirish oson. Ammo men hozir ixtiyorimizda bo‘lgan o‘yinchilardan mamnunman.

Biz o‘z jarohatlarimiz bilan ishlashimiz kerak, Mikel Arteta ham o‘z jamoasidagi jarohatlar bilan shug‘ullanishi lozim. Ammo bizga bunday futbolchilar kerak, chunki ular top-darajadagi o‘yinchilar», — deya Alonsoning so‘zlarini Sky Sports keltirdi.