«Манчестер Сити» футболчиси Антуан Семеньо жамоасининг Премьер-лига чемпионлиги учун курашдаги имкониятларини қандай баҳолаши ҳақида гапириб берди.
Чоршанба куни «шаҳарликлар» «Фулхэм»ни йирик (3:0) ҳисобда мағлуб этишди ва турнир жадвалида пешқадамлик қилаётган «Арсенал» билан орадаги фарқни 3 очкогача қисқартиришди.
«Ростини айтсам, бу мен учун янгилик. Титул учун курашиш ёқимли, аммо шу билан бирга, бу жиддий босим ва юқори талаб демакдир. Менимча, бизда буни уддалай оладиган даражада кучли жамоа бор. Олдинда яна 12 та ўйин кутиб турибди — биз шу руҳда давом этишимиз керак», — деди Семеньо TNT Sports телеканалига берган интервьюсида.
Бугун «Арсенал» сафарда «Брентфорд»га қарши баҳс олиб боради.
