Инглизлар Жаҳон чемпионати бошланишидан олдин ўртоқлик учрашуви ўтказиш учун яна бир рақиб топишди. «The Mirror» нашри хабарига кўра, Англия терма жамоасига Коста-Рика рақиблик қилади.
Учрашув 10 июнь куни бўлиб ўтади. Аввалроқ инглизлар 6 июнь куни Янги Зеландия билан ўртоқлик ўйинида тўқнаш келиши маълум бўлган эди. Ҳар икки баҳс АҚШда, Флоридадаги машғулот базаси яқинида ўтказилади, бироқ аниқ манзил ҳозирча белгиланмаган.
Англия ва Коста-Рика шу кунгача икки бор тўқнаш келишган. 2018 йилдаги ўртоқлик учрашувида инглизлар Маркус Решфорд ва Дэнни Уэлбекнинг голлари эвазига 2:0 ҳисобида ғалаба қозонишган бўлса, ундан 4 йил аввал Жаҳон чемпионати гуруҳ босқичида жамоалар нурсиз дуранг (0:0) қайд этишган.
Томас Тухель шогирдлари 17 июнь куни Жаҳон чемпионатидаги иштирокларини Хорватияга қарши ўйин билан бошлашади. Шунингдек, ушбу гуруҳдан Гана ва Панама терма жамоалари жой олган.
