«Брюгге» ярим ҳимоячиси Александар Станкович ўз келажаги борасидаги орзулари билан ўртоқлашди.
«Менинг орзум — «Интер»га қайтиш. Мен «Интер» мухлисиман ва бу клубни яхши кўраман. Умид қиламанки, кун келиб бу амалга ошади», — дея Станковичнинг сўзларини келтирмоқда «Sky Sports».
Александар Станкович — афсонавий Деян Станковичнинг ўғли ва «Интер» академияси тарбияланувчиси ҳисобланади. У 2025 йилда Милан клубидан «Брюгге»га 9 миллион евро эвазига ўтган эди. Бироқ «нерадзурри» футболчини қайта сотиб олиш ҳуқуқини (опция) ўзида сақлаб қолган. Маълумотларга кўра, «Интер» уни 2026 йилда 22-23 миллион еврога ёки 2027 йилда 25 миллион еврога қайтариб олиши мумкин.
Жорий 2025/2026 йилги мавсумда сербиялик 20 ёшли ярим ҳимоячи Бельгия жамоаси сафида барча мусобақаларда 37 та ўйинда майдонга тушиб, 7 та гол урди ва 4 та голли узатмани амалга оширди. Унинг «Брюгге» билан шартномаси 2029 йилнинг ёзигача мўлжалланган.
