«Манчестер Юнайтед»нинг собиқ ҳужумчиси Майкл Оуэн ярим ҳимоячи Бруну Фернандешнинг шу ёзда жамоани тарк этиши мумкинлиги ҳақидаги миш-мишларга муносабат билдирди. Унинг фикрича, «қизил иблислар» португалиялик футболчини сотиш вариантини кўриб чиқишлари керак.

«Бруну Фернандешни сотиш — унинг ёшини ҳисобга олсак, қизиқарли масала. Унда керакли фазилатлар ва тажриба бор, лекин бу бизнес ва ҳар кимнинг ўз нархи бор. Агар гап катта пул ҳақида кетаётган бўлса, уни сотиш ҳақида қарор қабул қилиш керак бўлади», — дея Оуэннинг сўзларини келтирмоқда «Metro».

Бруну Фернандешнинг «Манчестер Юнайтед» билан амалдаги шартномаси 2027 йилнинг ёзига қадар мўлжалланган. Жорий мавсумда ярим ҳимоячи 25 та ўйинда майдонга тушиб, 6 та гол урди ва 13 та голли узатмани амалга оширди.