Роттердамнинг «Фейеноорд» клуби Раҳим Стерлинг билан шартнома имзоланганини расман эълон қилди. 31 ёшли вингер Нидерландия гранди сафига эркин агент сифатида келиб қўшилди.

Стерлинг ва «Челси» ўртасидаги шартнома ўтган ойнинг охирида икки томонлама келишувга кўра бекор қилинган эди. Футболчининг янги жамоаси билан келишуви жорий мавсум якунига қадар (2026 йилнинг июнигача) мўлжалланган бўлиб, унда ҳамкорликни узайтириш имконияти ҳам кўзда тутилган.

Маълумот учун, Стерлинг фаолияти давомида илк бор Англия Премьер-лигасидан ташқарида тўп сурадиган бўлди. Унинг «Фейеноорд»ни танлашида клуб бош мураббийи, афсонавий Робин ван Перси билан ўтказилган музокаралар муҳим рол ўйнаган.