Мадриднинг «Атлетико» клуби ҳужумчиси Хулиан Альварес Испания Кубоги ярим финали доирасидаги «Барселона»га қарши ўйинда ўзининг голсиз ўйинлар сериясига чек қўйди.

Аргентиналик футболчи «кўк-анорранглилар» учун даҳшатли кечган биринчи бўлим якунида гол уриб, «матрасчилар» фойдасига 4:0 ҳисобини ўрнатди. 26 ёшли футболчи учун бу икки ойдан ортиқ вақт ичида киритилган илк гол бўлди — у бундан олдинги 11 та учрашувда бирор марта ҳам рақиблар дарвозасини ишғол қила олмаганди. Ички турнирларда эса ҳужумчи 1 ноябрдан бери гол урмаётган эди.

Аввалроқ Каталония гранди дарвозасини Антуан Гризманн ва Адемола Лукман ишғол қилишганди. Ҳаммаси эса ҳимоячи Эрик Гарсиянинг кутилмаган голидан бошланди — унинг хавфсиз кўринган узатмасини дарвозабон Жоан Гарсия қабул қила олмади.