Madridning «Atletiko» klubi hujumchisi Xulian Alvares Ispaniya Kubogi yarim finali doirasidagi «Barselona»ga qarshi o‘yinda o‘zining golsiz o‘yinlar seriyasiga chek qo‘ydi.
Argentinalik futbolchi «ko‘k-anorranglilar» uchun dahshatli kechgan birinchi bo‘lim yakunida gol urib, «matraschilar» foydasiga 4:0 hisobini o‘rnatdi. 26 yoshli futbolchi uchun bu ikki oydan ortiq vaqt ichida kiritilgan ilk gol bo‘ldi — u bundan oldingi 11 ta uchrashuvda biror marta ham raqiblar darvozasini ishg‘ol qila olmagandi. Ichki turnirlarda esa hujumchi 1 noyabrdan beri gol urmayotgan edi.
Avvalroq Kataloniya grandi darvozasini Antuan Grizmann va Ademola Lukman ishg‘ol qilishgandi. Hammasi esa himoyachi Erik Garsiyaning kutilmagan golidan boshlandi — uning xavfsiz ko‘ringan uzatmasini darvozabon Joan Garsiya qabul qila olmadi.
