А Сериянинг энг яхши футболчиси деб топилган "Наполи" ярим ҳимоячиси Скотт Мактоминай Англия чемпионатига қайтиши мумкин. Бу ҳақда "Tuttomercatoweb" журналистлари хабар тарқатди.

Манба берган маълумотларга кўра, шотландиялик хавбекнинг хизматларига унинг собиқ клуби — "Манчестер Юнайтед" қизиқиш билдирмоқда. Скотт 2017 йилдан 2024 йилгача манкунианликлар шарафини ҳимоя қилган, шундан сўнг Италияга йўл олган эди.

Бундан олдин матбуотда Мактоминайга Лондоннинг "Арсенал" клуби томонидан ҳам қизиқиш борлиги ҳақида хабарлар берилганди.

Ҳозирда ярим ҳимоячи 45 миллион еврога баҳоланмоқда. Мактоминайнинг Неаполь клуби билан тузган меҳнат шартномаси 2028 йилнинг ўрталаригача амал қилади.