"Бавария" дарвозабони Мануэль Нойер ўзини бошқа позицияда ҳам синаб кўриши мумкин бўлганини таъкидлади.

Хосеп Гвардиола мюнхенликлар мураббийи бўлган кезларида дарвозабонни майдон ўйинчиси сифатида тушириш ҳақида ўйлаб кўрган эди. Журналистлар 39 ёшли жамоа сардорининг ўзидан бу ҳақда сўрашди.

"Мен пастроқ даражадаги лигада майдон ўйинчиси сифатида бемалол тўп тепа олардим. Масалан, учинчи дивизионда, тўп назоратига асосланган жамоада. Эҳтимол, менга бироз тезлик етишмасди, лекин ўзимни кўрсата олган бўлардим. Марказий ҳимоячи бўлармидим ёки Хави Мартинес каби таянч ярим ҳимоячисими — билмадим. Бу қизиқ бўларди. Лекин мен дарвозабон сифатида эришган ютуқларимдан жуда мамнунман", — деди Нойер "L'Equipe" нашрига берган интервьюсида.

Жорий мавсумда юлдузли фахрий "Бавария" сафида 27 та ўйин ўтказиб, ўз дарвозасидан 27 та тўп олиб чиқди.