Англия терма жамоаси бош мураббийи Томас Тухель "Манчестер Юнайтед" ярим ҳимоячиси Кобби Майну ҳақидаги фикрлари билан ўртоқлашди.
20 ёшли футболчи Рубен Аморим даврида "қизил иблислар"нинг асосий таркибидаги ўрнини йўқотган эди, шу сабабли миллий жамоага чақирилмай қўйганди. Январь ойида истеъфога чиқарилган португалиялик мураббий ўрнига Майкл Кэррик тайинланди ва у ёш хавбекни дарҳол таркибга қайтарди.
"Майнуни яна майдонда кўриш жуда ёқимли. Кобби — ақл бовар қилмайдиган даражада иқтидорли ўйинчи. У аллақачон Англия терма жамоаси сафида йирик турнирда иштирок этган ва унда яна жамоамизга кириш учун имкониятлар бор", — дея Тухелнинг сўзларини келтиради "UtdDistrict".
Яқинда германиялик мутахассис Англия терма жамоаси билан 2028 йилнинг ёзига қадар мўлжалланган янги шартнома имзолади.
