Angliya terma jamoasi bosh murabbiyi Tomas Tuxel "Manchester Yunayted" yarim himoyachisi Kobbi Maynu haqidagi fikrlari bilan o‘rtoqlashdi.
20 yoshli futbolchi Ruben Amorim davrida "qizil iblislar"ning asosiy tarkibidagi o‘rnini yo‘qotgan edi, shu sababli milliy jamoaga chaqirilmay qo‘ygandi. Yanvar oyida iste’foga chiqarilgan portugaliyalik murabbiy o‘rniga Maykl Kerrik tayinlandi va u yosh xavbekni darhol tarkibga qaytardi.
"Maynuni yana maydonda ko‘rish juda yoqimli. Kobbi — aql bovar qilmaydigan darajada iqtidorli o‘yinchi. U allaqachon Angliya terma jamoasi safida yirik turnirda ishtirok etgan va unda yana jamoamizga kirish uchun imkoniyatlar bor", — deya Tuxelning so‘zlarini keltiradi "UtdDistrict".
Yaqinda germaniyalik mutaxassis Angliya terma jamoasi bilan 2028 yilning yoziga qadar mo‘ljallangan yangi shartnoma imzoladi.
