Лондоннинг “Тоттенҳэм” клуби Игор Тудор билан мавсум охиригача шартнома имзоланганини эълон қилди. 47 ёшли мутахассис яқинда ишдан бўшатилган Томас Франкнинг ўрнини эгаллади.

“Бундай муҳим паллада клубга қўшилиш мен учун катта шараф. Мақсадларим аниқ — ўйинимизда барқарорликни таъминлаш ва ҳар бир баҳсда ғалаба қозониш. Таркибда кучли ижрочилар кўп, менинг вазифам эса уларни жипслаштириш ва натижаларни тезда яхшилашдир”, дейди Тудор ўзининг илк интервьюсида.

Игор Тудор мураббийлик фаолияти давомида Европанинг кўплаб клубларида, жумладан, “Ювентус”, “Лацио”, “Марсель” ва “Галатасарой”да ишлаган. У 2025 йилнинг мартидан октябригача Туриннинг “Ювентус” клубини бошқарган эди. Футболчи сифатида ҳам у айнан “Ювентус” сафида икки бор Италия чемпиони бўлган ва 1998-йилги Жаҳон чемпионатида Хорватия билан бронза медалларини қўлга киритган.

Маълумот учун, 22 февраль куни “Тоттенҳэм” ўз майдонида чемпионат пешқадами ва азалий рақиби — “Арсенал”ни қабул қилади. Мазкур беллашув Тудор учун жамоадаги дебют баҳс ҳисобланади.