Мадриднинг "Реал" клуби дарвозабони Тибо Куртуа ўнг қанот ҳимоячиси Трент Александр-Арнольднинг ўйини ҳақида ўз фикри билан ўртоқлашди.
Инглиз футболчиси Ла Лиганинг "Реал Сосьедад"га қарши кечган шанба кунги баҳси (4:1) қаҳрамонларидан бирига айланди. 27 ёшли футболчи Гонсало Гарсия томонидан урилган биринчи голга ҳаммуаллифлик қилди.
"Трент ажойиб фазилатларга эга, бу шундоқ ҳам аён эди. У биз учун жуда фойдали. Бугун у ажойиб узатмаларни амалга оширди — масалан, биринчи гол содир бўлган вазиятда. Барча соғ-саломат бўлса, биз анча кучлироқ бўламиз — шунда футболчиларни ўзларига нотаниш позицияларда ўйнатишга тўғри келмайди", — деди Куртуа ўйиндан кейинги интервьюсида.
Александр-Арнольд декабрь ойи бошидан бери илк бор "қаймоқранглилар"нинг асосий таркибида майдонга тушди. "Ливерпуль"нинг собиқ футболчиси яқиндагина жароҳатидан қутилиб, сафга қайтган эди.
