«Рома» ҳужумчи Дониэлл Маленни «Астон Вилла»дан тўлиқ сотиб олишни режалаштирмоқда. Ҳозирда футболчи римликлар сафида ижара асосида тўп сурмоқда.
Келишув 16 январда расмийлаштирилган эди. Ўшандан бери ҳужумчи А Серияда бешта ўйин ўтказиб, бешта гол уришга улгурди. 2025/2026 йилги мавсум давомида эса унинг ҳисобида жами 34 та ўйин, 12 та гол ва иккита голли узатма мавжуд.
Фабрицио Романонинг маълумотига кўра, римликлар мавсум якунида бирмингемликларга футболчи учун 25 млн евро тўлашга тайёр. Январь ойида ижара учун тўланган икки миллион евро ушбу суммадан чегириб ташланади.
Шу билан бирга, агар «Рома» Чемпионлар лигаси ёки Европа лигасига йўлланма олса ва футболчи ўйинларнинг камида 50 фоизида иштирок этса, сотиб олиш опцияси мажбурийга айланади. Шунингдек, «Астон Вилла» Маленнинг кейинги сотувидан 10 фоиз улуш оладиган бўлди.
