Каталониянинг "Барселона" клуби яна мағлубиятга учради, бу сафар Испания чемпионати доирасидаги "Жирона"га қарши баҳсда. "Барселона"нинг германиялик устози Ханси Флик вазиятдан норози эканлигини яширмади.
Унинг сўзларига кўра, гап инқироз ҳақида кетмоқда — ўтган ҳафтада "Барселона" Испания Кубогида Мадриднинг "Атлетико" жамоасига 0:4 ҳисобида йирик мағлубиятга учраган эди.
"Биз яхши ҳолатда эмасмиз, биз инқирозга юз тутдик. Ҳозир бизда жавобларни топиш ва қаттиқ ишлаш учун бир ҳафта вақт бор. Балки бизга бошқача менталитет ва бошқа даража керакдир. Биз яхшироқ ўйнашимиз шарт", — дея Фликнинг сўзларини келтиради "Барселона" клуби расмий сайти.
Ушбу натижалардан сўнг "Барселона" Испания чемпионати турнир жадвалида биринчи ўринни бой берди.
