Ўтган дам олиш кунлари Лондоннинг "Челси" клуби Англия Кубоги доирасида "Халл Сити"га қарши майдонга тушди. Ўйин олдидан "аристократлар" майдонга чиқиб келаётиб, уларни кутиб турган "Халл" болалар жамоасининг кичик ёшли футболчилари ёнидан ўтишди.

"Челси" юлдузлари болакайларга ҳеч бўлмаганда минимал даражада эътибор қаратиши кутилганди, бироқ бундай бўлмади. Видеоёзувлар шуни кўрсатдики, лондонлик футболчилар болаларни шунчаки менсимасдан, эътибор бермай ўтиб кетишган.

Ушбу ҳолат Англияда жиддий баҳс-мунозараларга сабаб бўлди. Кўпчиликнинг фикрича, клуб раҳбарияти футболчиларнинг бундай муносабати учун узр сўраши керак. Ҳатто "Челси"нинг ашаддий мухлислари ҳам ўз футболчиларини уятсизликда айблаб, улардан норози бўлишмоқда.