«Барселона» бош мураббийи Ханс-Дитер Флик «Жирона»дан учралган мағлубиятдан сўнг, баҳона қилиш учун етарлича сабаб бўлса-да, ҳакамни айблашдан тийилди. Ҳатто рақиб футболчиси Клаудио Эчеверри ҳам голдан олдин Жюль Кундега нисбатан қоида бузганини тан олди.

«У ерда фол бор эди, тўғрими? Бошқа гапирадиган гап йўқ. Агар биз яхши ўйнаганимизда, мен бу қарорни танқид қилган бўлардим. Аммо буни баҳона сифатида ишлатишни истамайман», — деди Флик журналистларга.

Ушбу тур якунларига кўра, «Барселона» пешқадамликни қўлдан чиқарди. Энди каталонияликлар биринчи ўриндаги «Реал»дан икки очкога ортда қолмоқда.

«Барселона» навбатдаги ўйинини 22 февраль куни «Леванте»га қарши ўтказади. Ўйин Тошкент вақти билан соат 20:15 да бошланади.