"Ювентус" ҳимоячиси Пьер Калюлю биринчи бўлим охирида майдондан четлатилгани сабабли, учрашувнинг танаффус вақтида 1:1 ҳисоби қайд этилиб турганда машмашали вазият юзага келди. "Ювентус" вакиллари ҳакамлар майдонни тарк этаётган вақтда уларга нисбатан эътирозларини билдиришган.
Клуб бош директори Дамьен Комолли таҳдидли ва агрессив хатти-ҳаракатлари учун 15 000 евро миқдорида жаримага тортилди ва 31 мартга қадар футболдан четлатилди. Шунингдек, футбол стратегияси бўйича директор Жоржьо Кьеллини ҳам жазоланди — у 27 февралгача дисквалификация қилинди. Ушбу қарорлар ҳақида инсайдер Жанлука Ди Марцио хабар бермоқда.
Ушбу мағлубиятдан сўнг "Ювентус" А Серияда бешинчи ўринга тушиб кетди. "Кекса синьора" пешқадам "Интер"дан 15 очко ортда қолмоқда.
