Мадриднинг «Реал» клуби ҳужумчиси Килиан Мбаппе Винисиус Жуниорга нисбатан қилинган ирқий ҳақоратларга муносабат билдирди.
Бразилиялик футболчининг сўзларига кўра, Чемпионлар лигаси доирасидаги ўйинда «Бенфика» аъзоси Жанлука Престианни уни ирқий камситувчи сўзлар билан ҳақорат қилган. «Қаймоқранглилар» форварди бу ҳақда ҳакамга маълум қилди — энди УЕФА ушбу ҳолатни текшириши лозим.
«Винисиус илгари ҳаётида одамларни провокация қилганми? Эҳтимол. Хатоларга йўл қўйганми? Бўлиши мумкин. Лекин у бундай муносабатга ҳеч қачон лойиқ эмас. Ушбу ҳақоратларни провокацияларга нисбатан лойиқ жавоб деб ҳисоблайдиган инсонларни тушунмайман. Менимча, бундай гапларни фақат ўзлари ҳеч қачон ирқий ҳақоратларга дуч келмаган одамларгина айтиши мумкин», — дея Мбаппенинг сўзларини «Madrid Zone» нашри келтирмоқда.
Баҳс «Реал»нинг кичик ҳисобдаги ғалабаси билан якунланди, ягона гол муаллифи эса айнан Винисиус бўлди.
