УЕФА "Реал" ва "Бенфика" (1:0) ўртасидаги Европа Чемпионлар Лигаси биринчи плей-офф ўйинида Винисиус Жуниор билан боғлиқ ирқчилик можаросига муносабат билдирди.
Бразилиялик футболчи Жанлука Престианини "маймун" деб аташда айблаганидан сўнг ўйин иккинчи бўлимда тўхтатилди. "Бенфика" ҳужумчиси футболка билан оғзини тўсган, бу эса лаблардан ўқишни имконсиз қилган.
"Ҳозирда кеча бўлиб ўтган ўйинларнинг расмий баённомалари ўрганилмоқда. Қоидабузарликлар ҳақида хабар берилган тақдирда, иш қўзғатилади ва агар улар интизомий жазога олиб келса, бу ҳақда УЕФА интизомий бўлими веб-сайтида эълон қилинади.
Ҳозирги босқичда бу масала бўйича қўшимча қиладиган ҳеч нарсамиз йўқ", - дейилади ташкилот баёнотида.
