«Интер» Чемпионлар лигасининг дастлабки ўтиш ўйинида «Буде-Глимт»га имкониятни бой бергач (1:3), Норвегия клубининг сунъий майдони ҳолатидан норозилигини билдирди.
Милан клубининг ҳисоблашича, рақиб аренасидаги газон сифати энг нуфузли еврокубок турнири стандартларига «яқин ҳам келмайди». Ўйиндан олдин кузатилган ноқулай об-ҳаво туфайли стадиондан 80 тонна қор чиқариб ташланган, натижада майдон четларида тўлиқ бартараф этилмаган бурмалар ва ботиқлар ҳосил бўлган. Қор ёғишидан аввал ҳам «Интер» ўз футболчиларининг хавфсизлигидан хавотирланиб, УЕФАга норасмий тарзда шикоят қилган эди.
Якунда «нерадзуррилар» ҳужумчиси Лаутаро болдир мушагидан жароҳат олиб, 61-дақиқада захирага олинди, ўйин охирида майдонга тушган ярим ҳимоячи Пётр Зелиньски ҳам шикастланди. Эҳтиёт чораси сифатида «Интер» ярим ҳимоячилари Давиде Фраттези ва Хакан Чалханоглу ушбу учрашувни ўтказиб юборишган эди.
