Лондоннинг «Тоттенхэм» клуби собиқ бош мураббийи Анге Постекоглу «Манчестер Юнайтед»ни дунёдаги ишлаш энг қийин бўлган клуб деб атади.
Унинг сўзларига кўра, бунга асосий сабаб — жамоа доимий равишда дуч келадиган ҳаддан ташқари юқори босимдир.
«Мураббий сифатида йилига 100 та матбуот анжуманига бардош бера оладиган, 10 та ўйинда ғалаба қозониб, биттасида мағлуб бўлса-ю, ўша ягона мағлубият учун «тилка-пора» қилинишига тайёр турадиган инсон керак», — деди мутахассис ESPN’га берган интервьюсида.
2024/2025 йилги мавсумда Постекоглу бошчилигидаги «Тоттенхэм» финалда «Манчестер Юнайтед»ни мағлуб этиб, Европа Лигаси ғолибига айланган эди. Ҳозирда «МЮ» бош мураббийи вазифасини вақтинчалик Майкл Каррик бажармоқда.
