Мадриднинг «Реал» клуби бош мураббийи Альваро Арбелоа «Бенфика» устози Жозе Моуриньонинг фикрларига жавоб қайтарди.
Эслатиб ўтамиз, Чемпионлар лигаси доирасидаги ўйиндан (0:1) сўнг Моуриньо «қаймоқранглилар» ҳужумчиси Винисиус Жуниор голни нишонлаш орқали рақиб мухлисларини провокация қилганини айтган эди. Ушбу баҳсда бразилиялик футболчи ирқчилик ҳақоратларига дуч келганди.
«Нима содир бўлганини ҳамма кўрди, барчамиз ўйинни кузатдик. Бу ҳақиқатан ҳам муҳим масала ва биз бунга кўз юма олмаймиз.
Мен бошқаларнинг, хоҳ у Компани бўлсин, хоҳ Моуриньо ёки бошқаси, фикрига изоҳ беришни ёқтирмайман. Ҳар ким ўз фикрига эга бўлиш ҳуқуқига эга ва мен ҳам ўз фикримни айтяпман. Винисиус ажойиб гол урди ва уни юзлаб марта бошқа футболчилар ижросида кўрганимиздек нишонлади. Биз қурбонни провокатор сифатида кўрсата олмаймиз. Такрорлайман: Винисиус қилган ҳеч бир ҳаракат ирқчиликни оқлай олмайди», — деди Арбелоа AS нашрига.
