Англия футбол ассоциацияси (FA) «Манчестер Юнайтед» ҳаммуассиси Жим Рэтклифф билан махсус суҳбат ўтказиб, унга «инглиз футболи иштирокчиси сифатидаги мажбуриятларини» эслатиб қўйди. Бу ҳақда Sky Sports нашри хабар бермоқда.
Бунга тадбиркорнинг Буюк Британиядаги миграция сиёсати ҳақидаги баҳсли фикрлари сабаб бўлган. Рэтклифф аввалроқ мамлакат «мигрантлар томонидан колонияга айлантирилганини» айтиб, шундай деган эди:
«9 миллион киши нафақа оладиган ва шу билан бирга жуда кўп миқдорда иммигрантлар келаётган иқтисодиётга эга бўлиш мумкин эмас».
Манбанинг хабарига кўра, FA Рэтклиффга ОАВга интервью бераётганда ўзининг футбол дунёсидаги мақомини ва бу билан боғлиқ мажбуриятларини унутмасликни маслаҳат берган. Шу билан бирга, «Манчестер Юнайтед» ҳамэгасига нисбатан ҳеч қандай жарима ёки интизомий жазо чоралари қўлланилмаслиги айтиб ўтилган.
