Франция терма жамоаси ва «Марсель» клубининг собиқ ҳимоячиси Франк Лебёф собиқ жамоасидаги мураббийлар алмашинуви юзасидан ўз фикрларини баён этди. Италиялик мутахассис Роберто Де Дзерби ўрнини сенегаллик мутахассис Хабиб Бейе эгаллади.

«Мен учун Хабибнинг тайинланиши — ижобий ечим. Сабаби, у клубни ва унинг ички тизими қандай ишлашини яхши билади. У муваффақиятга эриша оладими? Ҳар ҳолда, унда натижа қайд этиш учун барча зарур воситалар ва имкониятлар мавжуд. Унинг жамоага келгани қувонарли ҳол. «Марсель»нинг собиқ футболчисини бош мураббий сифатида кўриш ажойиб воқеа», — дея Лебёфнинг сўзларидан иқтибос келтирмоқда GFFN.

Маълумот ўрнида, Хабиб Бейе 2003 йилдан 2007 йилгача «Марсель» таркибида тўп сурган. Шунингдек, у фаолияти давомида «ПСЖ»нинг ўринбосарлар жамоаси, «Страсбург» (ушбу клуб билан Франция Кубоги соҳиби бўлган), «Астон Вилла», «Донкастер» ва «Ньюкасл» клубларида иштирок этган. «Ньюкасл» сафида бир маротаба мавсумнинг энг яхши футболчиси деб топилган. Мураббийлик фаолияти давомида эса «Ред Стар» ва «Ницца» каби клубларда иш тажрибасига эга.