Fransiya terma jamoasi va «Marsel» klubining sobiq himoyachisi Frank Lebyof sobiq jamoasidagi murabbiylar almashinuvi yuzasidan o‘z fikrlarini bayon etdi. Italiyalik mutaxassis Roberto De Dzerbi o‘rnini senegallik mutaxassis Xabib Beye egalladi.

«Men uchun Xabibning tayinlanishi — ijobiy yechim. Sababi, u klubni va uning ichki tizimi qanday ishlashini yaxshi biladi. U muvaffaqiyatga erisha oladimi? Har holda, unda natija qayd etish uchun barcha zarur vositalar va imkoniyatlar mavjud. Uning jamoaga kelgani quvonarli hol. «Marsel»ning sobiq futbolchisini bosh murabbiy sifatida ko‘rish ajoyib voqea», — deya Lebyofning so‘zlaridan iqtibos keltirmoqda GFFN.

Ma’lumot o‘rnida, Xabib Beye 2003 yildan 2007 yilgacha «Marsel» tarkibida to‘p surgan. Shuningdek, u faoliyati davomida «PSJ»ning o‘rinbosarlar jamoasi, «Strasburg» (ushbu klub bilan Fransiya Kubogi sohibi bo‘lgan), «Aston Villa», «Donkaster» va «Nyukasl» klublarida ishtirok etgan. «Nyukasl» safida bir marotaba mavsumning eng yaxshi futbolchisi deb topilgan. Murabbiylik faoliyati davomida esa «Red Star» va «Nissa» kabi klublarda ish tajribasiga ega.