Лондоннинг «Арсенал» клуби ярим ҳимоячиси Деклан Райс «Тоттенхэм» жамоасига қарши кечадиган дерби учрашуви олдидан мухлисларнинг қўллаб-қувватлаши борасидаги фикрлари билан ўртоқлашди.
Сўнгги вақтларда «канонирлар»нинг Премьер-лигадаги натижаларида беқарорлик кузатилаётган бўлса-да, жамоа турнир жадвалида ҳозирча пешқадамликни сақлаб қолмоқда. Якшанба куни Микель Артета шогирдлари «шпорлар»га қарши баҳс олиб боради — чемпионлик пойгаси фаворити учун навбатдаги очко йўқотилиши жуда қимматга тушиши мумкин.
«Ҳозир бизга мухлисларимизнинг далдаси ҳар қачонгидан ҳам кўпроқ зарур. Биз биргаликда узоқ йўлни босиб ўтдик ва ҳозир бир-биримизга қарши чиқадиган вақт эмас. Барчамиз бир тўлқинда эканлигимизни, бир йўлдан кетаётганимизни ҳамда бир-биримиз, клуб ва умумий мақсад учун курашаётганимизни ҳис қилишимиз лозим», — дея журналист Саймон Коллингс Райснинг сўзларини келтирмоқда.
Айни пайтда «Арсенал» турнир жадвалида «Манчестер Сити»дан беш очко олдинда бормоқда, бироқ «шаҳарликлар» ихтиёрида битта захира ўйини мавжуд.
