Londonning «Arsenal» klubi yarim himoyachisi Deklan Rays «Tottenxem» jamoasiga qarshi kechadigan derbi uchrashuvi oldidan muxlislarning qo‘llab-quvvatlashi borasidagi fikrlari bilan o‘rtoqlashdi.
So‘nggi vaqtlarda «kanonirlar»ning Premyer-ligadagi natijalarida beqarorlik kuzatilayotgan bo‘lsa-da, jamoa turnir jadvalida hozircha peshqadamlikni saqlab qolmoqda. Yakshanba kuni Mikel Arteta shogirdlari «shporlar»ga qarshi bahs olib boradi — chempionlik poygasi favoriti uchun navbatdagi ochko yo‘qotilishi juda qimmatga tushishi mumkin.
«Hozir bizga muxlislarimizning daldasi har qachongidan ham ko‘proq zarur. Biz birgalikda uzoq yo‘lni bosib o‘tdik va hozir bir-birimizga qarshi chiqadigan vaqt emas. Barchamiz bir to‘lqinda ekanligimizni, bir yo‘ldan ketayotganimizni hamda bir-birimiz, klub va umumiy maqsad uchun kurashayotganimizni his qilishimiz lozim», — deya jurnalist Saymon Kollings Raysning so‘zlarini keltirmoqda.
Ayni paytda «Arsenal» turnir jadvalida «Manchester Siti»dan besh ochko oldinda bormoqda, biroq «shaharliklar» ixtiyorida bitta zaxira o‘yini mavjud.
