Португалия терма жамоаси ва «Милан» вингери Рафаэл Леау Италия А Сериясини Англия Премьер-лигасига алмаштириши мумкин. Бу ҳақда Football Transfers хабар бермоқда.

Манбанинг маълумотларига кўра, 26 ёшли ҳужумкор ярим ҳимоячининг трансфери бўйича Лондоннинг «Арсенал» клуби музокаралар олиб бормоқда. «Тўпчилар» футболчини ёзги трансфер ойнасида ўз сафига қўшиб олишни режалаштирган.

«Россонери» эса, агар португалиялик юлдуз учун 75-80 миллион евро таклиф қилинса, у билан хайрлашишга тайёр. «Милан» ва Леау ўртасидаги амалдаги меҳнат шартномаси 2028 йилнинг ўрталаригача амал қилади.

Жорий мавсумда Рафаэл «Милан» либосида 20 та учрашув ўтказиб, 9 та гол урди ва 2 та голли узатмани амалга оширди.