“Челси” сунъий интеллект технологиялари соҳасида фаолият юритувчи IFS компанияси билан ҳамкорлик шартномасини имзолади. Томонлар ўртасидаги келишув 2028 йилга қадар амал қилади, бироқ мазкур ташкилот Лондон клубининг титул ҳомийси сифатида фақат 2025/2026 йилги мавсум якунига қадар фаолият кўрсатади.

Саноат сунъий интеллекти учун дастурий таъминот етказиб берувчи компания логотипи “аристократлар”нинг эркаклар ва аёллар жамоалари либосларидан жой олади. Янги ҳомий номи туширилган либослардаги дебют ўйинлари Англия Премьер Лигасининг 27-тури доирасида бўлиб ўтади.

“Ушбу ҳамкорлик — илғор технологиялар имкониятларидан фойдаланган ҳолда ҳамда майдонда ва ундан ташқарида қилаётган барча ишларимизни яхшилаш учун сунъий интеллект салоҳиятини очиш орқали соҳада етакчиликни давом эттириш мақсадимизнинг тасдиғидир”, дейди клуб президенти Жейсон Ганнон.

“Челси” 2025/2026 йилги мавсумда Англия Премьер Лигасида титул ҳомийсисиз ҳаракат қилаётган ягона клуб эди. Three телекоммуникация компанияси билан шартнома 2023 йилда клубнинг собиқ эгаси Роман Абрамовичга қарши санкциялар туфайли бекор қилинган эди.

Шундан сўнг лондонликларнинг футболкалари олд қисмида Infinite Athlete спорт-технология компанияси ва Damac қурилиш компанияси логотиплари пайдо бўлди. BBC Спорт маълумотларига кўра, клуб раҳбарияти навбатдаги узоқ муддатли титул ҳомийлик шартномасидан ҳар мавсумда тахминан 65 миллион фунт (74 миллион евро) ишлаб олишни режалаштирмоқда.

Бугун, 21 февраль куни “Челси” АПЛнинг 27-тури доирасида ўз майдонида “Бёрнли”ни қабул қилади. Лиам Росенёр шогирдлари 44 очко жамғарган ҳолда чемпионат жадвалида бешинчи ўринни эгаллаб турибди.