“Chelsi” sun’iy intellekt texnologiyalari sohasida faoliyat yurituvchi IFS kompaniyasi bilan hamkorlik shartnomasini imzoladi. Tomonlar o‘rtasidagi kelishuv 2028 yilga qadar amal qiladi, biroq mazkur tashkilot London klubining titul homiysi sifatida faqat 2025/2026 yilgi mavsum yakuniga qadar faoliyat ko‘rsatadi.

Sanoat sun’iy intellekti uchun dasturiy ta’minot yetkazib beruvchi kompaniya logotipi “aristokratlar”ning erkaklar va ayollar jamoalari liboslaridan joy oladi. Yangi homiy nomi tushirilgan liboslardagi debyut o‘yinlari Angliya Premyer Ligasining 27-turi doirasida bo‘lib o‘tadi.

“Ushbu hamkorlik — ilg‘or texnologiyalar imkoniyatlaridan foydalangan holda hamda maydonda va undan tashqarida qilayotgan barcha ishlarimizni yaxshilash uchun sun’iy intellekt salohiyatini ochish orqali sohada yetakchilikni davom ettirish maqsadimizning tasdig‘idir”, deydi klub prezidenti Jeyson Gannon.

“Chelsi” 2025/2026 yilgi mavsumda Angliya Premyer Ligasida titul homiysisiz harakat qilayotgan yagona klub edi. Three telekommunikasiya kompaniyasi bilan shartnoma 2023 yilda klubning sobiq egasi Roman Abramovichga qarshi sanksiyalar tufayli bekor qilingan edi.

Shundan so‘ng londonliklarning futbolkalari old qismida Infinite Athlete sport-texnologiya kompaniyasi va Damac qurilish kompaniyasi logotiplari paydo bo‘ldi. BBC Sport ma’lumotlariga ko‘ra, klub rahbariyati navbatdagi uzoq muddatli titul homiylik shartnomasidan har mavsumda taxminan 65 million funt (74 million yevro) ishlab olishni rejalashtirmoqda.

Bugun, 21 fevral kuni “Chelsi” APLning 27-turi doirasida o‘z maydonida “Byornli”ni qabul qiladi. Liam Rosenyor shogirdlari 44 ochko jamg‘argan holda chempionat jadvalida beshinchi o‘rinni egallab turibdi.