"Тоттенхэм"нинг бразилиялик ҳужумчиси Ришарлисон ўтган трансфер ойнасида "Фламенго" қизиқишларига сабаб бўлган эди. Бу ҳақда журналист Экрем Конур хабар бермоқда.
Манбанинг маълумотларига кўра, Бразилия жамоаси 28 ёшли футболчига қизиқиш билдирган, бироқ нархнинг жуда баландлиги сабабли келишув амалга ошмаган. Бундан ташқари, Ришарлисоннинг ўзи ҳам ҳозирча ватанига қайтишга тайёр эмас.
Жорий мавсумда ҳужумчи барча мусобақаларни ҳисобга олганда 31 та ўйинда майдонга тушди, саккиз бор рақиблар дарвозасини ишғол қилди ва учта голли узатма муаллифига айланди.
Ришарлисоннинг "Тоттенхэм" билан тузилган меҳнат шартномаси 2027 йилнинг ёзига қадар мўлжалланган. "Transfermarkt" портали маълумотларига кўра, футболчининг қиймати 28 миллион еврони ташкил этади.
