"Милан" бош мураббийи Массимилиано Аллегри Италия А Сериясининг жорий мавсумидаги чемпионлик пойгаси ҳақида ўз фикрлари билан ўртоқлашди.
"Интер — яққол фаворит. Уларда 64 очко бор ва улар 90 очко жамғариши мумкин. Мақсадимизга эришиш учун биз 13 та ўйинда 12 та ғалаба қозонишимиз ва фақат бир марта мағлуб бўлишимиз мумкин. Бу — математика. Агар улар хато қилишса-ю, биз бу имкониятдан фойдалана олмасак, бу фақат ўзимизнинг айбимиз бўлади", — дея Аллегрининг сўзларини келтиради "Nerazzurri Society" нашри.
26 турдан сўнг "Интер" 64 очко билан Италия чемпионати турнир жадвалида пешқадамлик қилмоқда. Иккинчи ўринда бораётган "Милан" билан фарқ ўн очкони ташкил этади, бироқ Аллегри жамоасида битта захира ўйини мавжуд.
22 февраль куни "Милан" ўз майдонида "Парма"ни қабул қилади. Учрашув Тошкент вақти билан соат 22:00 да бошланиши режалаштирилган.
