"Milan" bosh murabbiyi Massimiliano Allegri Italiya A Seriyasining joriy mavsumidagi chempionlik poygasi haqida o‘z fikrlari bilan o‘rtoqlashdi.

"Inter — yaqqol favorit. Ularda 64 ochko bor va ular 90 ochko jamg‘arishi mumkin. Maqsadimizga erishish uchun biz 13 ta o‘yinda 12 ta g‘alaba qozonishimiz va faqat bir marta mag‘lub bo‘lishimiz mumkin. Bu — matematika. Agar ular xato qilishsa-yu, biz bu imkoniyatdan foydalana olmasak, bu faqat o‘zimizning aybimiz bo‘ladi", — deya Allegrining so‘zlarini keltiradi "Nerazzurri Society" nashri.

26 turdan so‘ng "Inter" 64 ochko bilan Italiya chempionati turnir jadvalida peshqadamlik qilmoqda. Ikkinchi o‘rinda borayotgan "Milan" bilan farq o‘n ochkoni tashkil etadi, biroq Allegri jamoasida bitta zaxira o‘yini mavjud.

22 fevral kuni "Milan" o‘z maydonida "Parma"ni qabul qiladi. Uchrashuv Toshkent vaqti bilan soat 22:00 da boshlanishi rejalashtirilgan.