Бразилия терма жамоаси бош мураббийи Карло Анчелотти Мадриднинг «Реал» клубидаги фаолияти давомида Тони Кроос билан юзага келган келишмовчиликни ёдга олди.
Кузги «эл-класико»да Винисиус Жуниор ва Хаби Алонсо иштирокидаги жанжалли вазият ҳақидаги саволга жавоб берар экан, италиялик мутахассис Кроос билан боғлиқ шунга ўхшаш воқеани сўзлаб берди.
«Бир сафар Тонини алмаштирганимда, у жуда қаттиқ ғазабланган эди. Эртаси куни мен у билан гаплашмадим. Майдонга чиқишдан олдин тасодифан тўқнаш келиб қолдик ва мен ундан: «Кечаги воқеа ҳақида гаплашиб оламизми ёки ҳаммаси ўтмишда қолдими?» деб сўрадим. У эса ҳаммаси ортда қолганини айтди», — дея Анчелоттининг сўзларини келтирмоқда Madrid Xtra.
Тони Кроос 2024 йилгача «Реал» шарафини ҳимоя қилган ва шундан сўнг фаолиятини якунлаган эди. Карло Анчелотти эса 2025 йил май ойи охирида Мадрид клубини тарк этиб, Бразилия терма жамоаси бошқарувини қўлга олди.
