Braziliya terma jamoasi bosh murabbiyi Karlo Anchelotti Madridning «Real» klubidagi faoliyati davomida Toni Kroos bilan yuzaga kelgan kelishmovchilikni yodga oldi.

Kuzgi «el-klasiko»da Vinisius Junior va Xabi Alonso ishtirokidagi janjalli vaziyat haqidagi savolga javob berar ekan, italiyalik mutaxassis Kroos bilan bog‘liq shunga o‘xshash voqeani so‘zlab berdi.

«Bir safar Tonini almashtirganimda, u juda qattiq g‘azablangan edi. Ertasi kuni men u bilan gaplashmadim. Maydonga chiqishdan oldin tasodifan to‘qnash kelib qoldik va men undan: «Kechagi voqea haqida gaplashib olamizmi yoki hammasi o‘tmishda qoldimi?» deb so‘radim. U esa hammasi ortda qolganini aytdi», — deya Anchelottining so‘zlarini keltirmoqda Madrid Xtra.

Toni Kroos 2024 yilgacha «Real» sharafini himoya qilgan va shundan so‘ng faoliyatini yakunlagan edi. Karlo Anchelotti esa 2025 yil may oyi oxirida Madrid klubini tark etib, Braziliya terma jamoasi boshqaruvini qo‘lga oldi.