Лондоннинг «Арсенал» клуби устози Микель Артета «Манчестер Юнайтед» ва «Челси» мухлисларининг чемпионлик пойгасидаги танловлари ҳақидаги саволга жавоб берди.

Кенг тарқалган фикрга кўра, «қизил иблислар» ва «кўклар» мухлисларининг аксарияти чемпионликни «Манчестер Сити» қўлга киритишини ва «канонирлар» яна совринсиз қолишини исташади.

«Улар кимни хоҳлашса, ўшани қўллаб-қувватлашлари мумкин, бу мени ташвишга солмайди. Ҳозир биз чемпионлик сари йўлдамиз, бу ёғини эса вақт кўрсатади. «Манчестер Юнайтед» ва «Челси» мухлислари «Арсенал»га бўлган адовати сабаб бошқа клубга мухлислик қилгандан кўра, ўз жамоаларининг кучли тўртликка киришига эътибор қаратганлари маъқулроқ», — деди Артета «Тоттенхэм» (4:1) устидан қозонилган ғалабадан кейинги интервьюсида.

«Арсенал» 61 очко билан турнир жадвалида пешқадамлик қилмоқда. «Манчестер Сити» битта захира ўйинига эга бўлган ҳолда беш очкога ортда қолмоқда.