«Ан-Наср» бош мураббийи Жорже Жезуш амалдаги шартномасини узайтириши мумкин. Саудия Арабистонидаги манбаларнинг хабар беришича, клуб раҳбарияти португалиялик мутахассисга 2027 йилнинг ўрталарига қадар мўлжалланган янги битим таклиф қилишга тайёр. «Ан-Наср» мутасаддилари мураббийнинг ишидан мамнун ва кейинги мавсумда ҳам у билан ҳамкорликни давом эттиришни истамоқда.
Аввалроқ, агар унинг ҳамюрти Криштиану Роналду ёзда жамоани тарк этса, Жорже Жезуш ҳам кетиши мумкинлиги ҳақида хабарлар тарқалган эди. Бироқ яқинда юлдуз ҳужумчи клубда қолиш ниятида эканлигини маълум қилди.
Жезуш ўтган йилнинг июль ойида «Ан-Наср» бошқарувини қўлга олган эди. Ҳозирда жамоа чемпионат турнир жадвалида пешқадамлик қилмоқда.
