«Барселона» Мадриднинг «Реал» клуби йўл қўйган хатодан унумли фойдаланиб, Ла Лига турнир жадвалида яна пешқадамга айланди.

«Кўк-анорранглилар» якшанба куни ўз майдонларида «Леванте»ни мағлуб этишди (3:0), бир кун аввал эса «қаймоқранглилар» «Осасуна»дан мағлубиятга учраган эди (1:2).

Ҳанс-Дитер Флик жамоаси «Реал»ни бир очкога ортда қолдирган ҳолда яна чемпионатда пешқадамлик қилмоқда. «Opta» суперкомпьютерининг ҳисоб-китобларига кўра, айни дамда «Барселона»нинг чемпионлик эҳтимоли 59,46 фоизни ташкил этмоқда, мадридликларнинг имкониятлари эса 40,35 фоизга баҳоланмоқда. Қолган барча жамоалар, жумладан, «Атлетико» ҳам 25 турдан сўнг чемпионлик учун курашиш имкониятини деярли йўқотган.