УЕФА Винисиус Жуниор Жанлука Престианнини ирқчиликда айблаган «Бенфика» — «Реал» учрашувидаги можарони ҳали тўлиқ ўрганиб чиққани йўқ. Шунга қарамай, «Бенфика» футболчиси аллақачон битта ўйинга вақтинчалик дисквалификация қилинди. Бунга дискриминация ҳолати дастлабки тарзда аниқлангани сабаб бўлган.

The Times журналистларига маълум бўлишича, Престианни ўз ҳимояси доирасида Винисиус биринчи бўлиб уни «пакана» деб ҳақорат қилганини даъво қилмоқчи. Бироқ, бу ирқчилик ҳаракати учун салмоқли оқлов бўла олмайди деб ҳисобланмоқда.

Маълумот учун, Жанлука Престианнининг бўйи анча паст — 166 сантиметрни ташкил этади.

Эслатиб ўтамиз, «Реал» сафарда «Бенфика»ни 1:0 ҳисобида мағлуб этган эди. Мадриддаги жавоб учрашуви эртага, чоршанба куни (25 февраль) бўлиб ўтади.