Бразилиялик ҳимоячи Фелипе Мело Мадриднинг «Реал» клуби ҳужумчиси Винисиус Жуниор ва Португалиянинг «Бенфика» клуби италиялик футболчиси Жанлука Престианни атрофидаги вазиятга нисбатан кескин фикр билдирди. Мелонинг таъкидлашича, Престианни гумон қилинаётган ирқчилик ҳаракати учун қамоқ жазосига ҳам тортилиши мумкин эди.
«Ҳозир 2026 йил. Қандай қилиб бундай воқеалар содир бўлиши мумкин? Бугунги кунда бу жиноят ҳисобланади. Престианни бу қилмиши учун қаттиқ жавоб бериши керак. Ҳам молиявий жиҳатдан, ҳам озодликдан маҳрум этиш орқали», — дея Мелонинг сўзларини «derbyderbyderby.it» нашри келтирмоқда.
Эслатиб ўтамиз, ҳозирда Фелипе Мело клубсиз қолган — у ўтган йили «Флуминенсе» билан шартномасини бекор қилган эди.
