«Ньюкасл» Чемпионлар лигасининг ўтиш босқичида «Қорабоғ» тўсиғидан қийинчиликсиз ўтди. Сарфардаги 6:1 ҳисобидаги ғалабадан сўнг барча масала ҳал бўлган эди. Ўз майдонида ҳам «қарғалар» ғалаба қозонишди, бироқ бу сафар ўйин анча кескин кечди — 3:2.

«Ньюкасл» вингери Жейкоб Мёрфи жавоб ўйинидан сўнг 1/8 финалда ким билан ўйнашни хоҳлаши ҳақидаги саволга жавоб берди. Қуръа натижаларига кўра, «Ньюкасл» ё «Барселона», ёки «Челси» жамоаларидан бирига рақиб бўлади.

«Ким бўлса ҳам фарқи йўқ. Очиғини айтсам, бизнинг ҳозирги таркибимиз ҳар қандай рақиб билан курашишга тайёр, айниқса плей-оффда. Биз ўз кучимизга ишонамиз. Шундай экан, рақиб ким бўлишининг аҳамияти йўқ», — деди Мёрфи «Amazon Prime» нашрига.

1/8 финал учрашувлари март ойида бўлиб ўтади. Мусобақанинг кейинги барча босқичларига ойдинлик киритувчи қуръа ташлаш маросими 27 февраль куни ўтказилади.