«Nyukasl» Chempionlar ligasining o‘tish bosqichida «Qorabog‘» to‘sig‘idan qiyinchiliksiz o‘tdi. Sarfardagi 6:1 hisobidagi g‘alabadan so‘ng barcha masala hal bo‘lgan edi. O‘z maydonida ham «qarg‘alar» g‘alaba qozonishdi, biroq bu safar o‘yin ancha keskin kechdi — 3:2.
«Nyukasl» vingeri Jeykob Myorfi javob o‘yinidan so‘ng 1/8 finalda kim bilan o‘ynashni xohlashi haqidagi savolga javob berdi. Qur’a natijalariga ko‘ra, «Nyukasl» yo «Barselona», yoki «Chelsi» jamoalaridan biriga raqib bo‘ladi.
«Kim bo‘lsa ham farqi yo‘q. Ochig‘ini aytsam, bizning hozirgi tarkibimiz har qanday raqib bilan kurashishga tayyor, ayniqsa pley-offda. Biz o‘z kuchimizga ishonamiz. Shunday ekan, raqib kim bo‘lishining ahamiyati yo‘q», — dedi Myorfi «Amazon Prime» nashriga.
1/8 final uchrashuvlari mart oyida bo‘lib o‘tadi. Musobaqaning keyingi barcha bosqichlariga oydinlik kirituvchi qur’a tashlash marosimi 27 fevral kuni o‘tkaziladi.
