Чемпионлар лигаси ўтиш босқичи доирасидаги «Реал»га қарши жавоб учрашуви олдидан «Бенфика» мухлислари Мадридда полиция билан тўқнашувга киришди.
«Record» нашрининг «CMTV» телеканалига таяниб хабар беришича, воқеа «Сантьяго Бернабеу» стадионига кириш йўлакларида содир бўлган.
«Бургутлар» мухлисларидан бири полиция томонидан ўрнатилган хавфсизлик кордонидан ташқарига чиққан, сўнгра юзини кўрсатишдан бош тортган. Шундан сўнг ҳуқуқ-тартибот идоралари ходимлари ҳужумга ўтган ва мухлислар билан тўқнашув бошланган.
Мухлислар ва полиция ўртасидаги тўқнашув натижасида «Бенфика»нинг бир нафар фанати жароҳат олди ва унга воқеа жойида тиббий ёрдам кўрсатилишига тўғри келди.
