Франциянинг "ПСЖ" жамоаси дарвозабони Матвей Сафонов жамоасининг Чемпионлар лигасининг кейинги босқичига чиққани ҳақида фикр билдирди. Аввалроқ парижликлар "Монако" билан 2:2 ҳисобида дуранг ўйнашган эди ва икки ўйин натижасига кўра (5:4) турнирнинг 1/8 финалига йўл олишди.
"Бир йил олдин ўз туғилган кунимда Чемпионлар лигасида ўйнашимни тасаввур ҳам қила олмасдим. Супер! Ҳам маънан, ҳам жисмонан жуда чарчадим. Етарлича оғир ўйин бўлди, лекин бугун Парижда байрам", — деди Сафонов ўзининг шахсий телеграм каналида эълон қилинган видеода.
1/8 финалда "ПСЖ" "Челси" ёки "Барселона" билан тўқнаш келиши кутилмоқда. Қуръа ташлаш маросими эртага, 27 февраль куни бўлиб ўтади.
