Мадриднинг «Реал» клуби ярим ҳимоячиси Арда Гюлер жамоа сафидаги ўзининг юзинчи ўйинини ўтказди. Ушбу юбилей баҳси туркиялик футболчининг 21 ёшга тўлган кунига тўғри келди — у Чемпионлар лигаси доирасидаги «Бенфика» билан учрашувда асосий таркибда майдонга тушди.
«Opta» маълумотларига кўра, Гюлер 2009/10 йилги мавсумдан бери «қаймоқранглилар» сафида юзта ўйинлик маррани забт этган учинчи энг ёш футболчига айланди. Бу кўрсаткичга ундан ҳам ёшроқ пайтида фақат Винисиус Жуниор (20 ёш 232 кунликда) ва Эдуардо Камавинга (20 ёш 275 кунликда) эриша олган.
