"Реал" расмий сайтида Чемпионлар лигаси доирасидаги "Бенфика"га қарши ўйинда ҳимоячи Рауль Асенсио орттириб олган жароҳат ҳақида маълумот эълон қилинди. Маълумки, футболчининг бўйин қисми махсус мослама билан фиксация қилиниб, майдондан замбилда олиб чиқиб кетилган эди.
"Реал" клуби Асенсиога ташхис қўйилганини маълум қилди: цервикал контрактура (бўйин мушакларининг қисқариши). 23 ёшли футболчининг тикланиш муддатлари очиқланмаган.
Интернетдаги маълумотларга кўра, гап бўйин мушакларининг доимий ёки вақти-вақти билан ихтиёрсиз равишда таранглашиб қолиши билан боғлиқ ҳолат ҳақида кетмоқда.
"Реал" Ла Лигадаги навбатдаги ўйинини душанба куни, 2 март куни ўз майдонида "Хетафе"га қарши ўтказади.
